Það er víst töff að prjóna!

Lesprjónið flytur

2009-10-30T14:43:00.000Z

Kæru lesprjónsgestir. Nú er lesprjónið flutt á Eyjuna og þaðan mun boðun fagnaðarerindisins halda áfram. Verið velkomin - smellið hér til að komast beint á nýja staðinn.
Bestu prjónakveðjur í heimi,
Ragga

Lóan er komin

2009-10-29T22:14:00.002Z

Jæja loksins er Lóan komin. Hér er hægt að sækja uppskriftina á pdf skjali í stærðinni 6-8 ára. Smellið hér. Uppskriftin er í þremur stærðum og bæði á ensku og íslensku. Munið að tengja Lóurnar ykkar við uppskriftina á Ravelry! Njótið!

Jólasveinahúfa

2009-10-15T14:27:00.000Z

Hér er uppskrift af jólasveinahúfu sem ég snaraði fram síðustu jól. Þegar prjónandi móðir er beðin um svoleiðis af lítilli nývaknaðri stúlku í desember er ekki annað hægt en að standa sig. Á myndinni er Álfrún sem fékka eina í sinn jólapakka.

Garn: Angora (hvítt), Loðband/einband (rautt)

Prjónar: 40 cm hringprjónn nr. 6 og sokkaprjónar nr.6 – eða langur hringprjónn nr. 6.

Stærðir: 0-2 (3-5 ára) 5-10 ára (fullorðins)

Ath. mjög gott er að prjóna húfur á langan hringprjón (100 cm eða lengri). Þannig þarf ekki að skipta yfir á sokkaprjóna þegar húfan þrengist efst.

Aðferð:
Fitjið upp 45 (50) 60 (70) lykkjur með tvöföldu hvítu angoragarni á prjón númer 6. Tengið í hring og byrjið að prjóna stroff: 3 sléttar og 2 brugðnar til skiptis. Þegar stroffið mælist 5(6)7(9) cm er skipt yfir í rauða garnið (tvöfalt loðband/einband) og prjónuð ein umferð slétt. Í næstu umferð er aukið út um 3(4)4(5) lykkjur jafnt yfir umferðina (hafið um það bil jafn margar lykkjur á milli, annars þarf þetta ekki að vera svo nákvæmt). Aukið út svona: takið bandið milli lykkjanna upp á vinstri prjóninn, prjónið í það snúið, þannig myndast ný lykkja.

Urtökur:
Þegar húfan mælist 14 (15) 16 (18) cm: Prjónið 2 l saman 5(6)6(7) sinnum með jöfnu millibili í næstu umferð.
Þegar húfan mælist 17(19)20(23) cm: Prjónið 2l saman 4(5)5(6) sinnum með jöfnu millibili í næstu umferð.
Þegar húfan mælist 22(23)25(30) cm: Prjónið 2l saman 4(5)5(6) sinnum með jöfnu millibili í næstu umferð.
Þegar húfan mælist 25(27)29(35) cm: Prjónið 2l saman 4(5)5(6) sinnum með jöfnu millibili í næstu umferð. Hér eftir eru úrtökur með 2 cm millibili – 2-4 sinnum í hverri úrtökuröð fyrir allar stærðir þar til alls 6-10 l eru eftir á prjónunum. Prjónið þá 2 og 2 saman út umferðina – slítið bandið og dragið í gegnum lykkjurnar sem eru eftir. Búið til dúsk og gangið stolt um götur með jólasveinahúfu á höfði!

Jólin koma

2009-09-17T13:57:00.000Z

Já, þau nálgast með ógnarhraða. Að minnsta kosti í heimi prjónara og annarra sem sem vilja helst gefa sínum nánustu heimagerðar jólagjafir. Hér er ein hugmynd. Ég keypti venjulegan ullarbol hjá Handprjónasambandinu og skreytti hann með svolitlu hekli. Þetta er svakalega sætt vesti og gæti gengið fyrir stelpur jafnt sem stráka.

Peysan Lóa

2009-09-17T13:24:00.000Z

Peysan Lóa er einföld, ofurlétt og mjúk stelpupeysa prjónuð úr Nammi. Peysan passar á 5-6 ára og í hana fóru ekki nema um 70g af Nammi. Að sjálfsögðu er peysan prjónuð að ofan - enda finnst mér ótrúlega mikill munur að prjóna peysur þannig, fæ ekki nóg af því.

Lóa númer tvö er alveg að verða tilbúin, hún er prjónuð á sama hátt en er með aðeins öðruvísi útaukningum á laskastöðunum, lokaðri, en ekki opinni eins og á myndunum hér. Hún er aðeins stærri og hefur "púffkant" að neðan - eins og sést á ermunum hér... algjört krútt. Ég er að vinna í því að gefa út uppskriftina - hana verður innan skamms hægt að nálgast ókeypis í Nálinni og hér á síðunni. Uppskriftin verður í bæði barna og fulorðinsstærðum. Þið munið svo að heimsækja Nammið hér.

Gerðuberg og leiðtogaprjón

2009-09-02T18:03:00.001Z

Jæja þá er ég með fyrirlestur um prjón á netinu í Gerðubergi í kvöld. Þar verða mánaðarleg handverks- og menningarkvöld í vetur undir stjórn hinnar hæfileikaríku knipldrottningar Margrétar Valdimarsdóttur sem ég kynntist í eftirminnilegu húsmæðraorlofi í Textílsetrinu á Blönduósi í sumar. Í tilefni þess hef ég nú hrúgað hingað inn nýjum hlekkjum á skemmtilega netprjónastaði, sjá neðarlega á hægri spássíu. Á vafri mínu í undirbúningnum endurnýjaði ég kynni við microrevolt prjónapönkarana og ákvað að útbúa með hjálp síðunnar prjónamynstur fyrir þá sem hefur alltaf dreymt um að prjóna okkar ljósa leiðtoga, Jóhönnu Sigurðardóttur. Hér er munstrið í sæmilegri stærð til að prenta út. Nú hlakka ég bara til að sjá göturnar fyllast af kátum prjónurum í jóhönnupeysum!!

Nammi komið út úr skápnum

2009-07-17T11:15:00.002Z

Nammi er fyrsta garnlínan frá Reykyarnvik. Nammi er smám saman að koma út úr skápnum og er byrjað að breytast í undursamlegar flíkur hér og þar. Núna fæst Nammi í Nálinni og á Etsy. Reykyarnvik og Nammi eiga líka sitt eigið blogg - verið velkomin í heimsókn þangað - reyndar er það á ensku því Nammi langar svo út í heim að hitta allskonar prjónara. Á Ravelry er hægt að tengja Nammi við prjónaverkefni - munið eftir því. Litirnir breytast í hverri vinnutörn því nýjar og spennandi blöndur verða til jafnóðum. Svo er aldeilis gleðiefni að ég hef fengið litunaraðstöðu á leigu hjá Textílfélagi Ísland sem rekur Textílverkstæðið Korpu á Korpúlfsstöðum.

Þeir sætustu hingað til

2009-06-15T11:04:00.002Z

Ég prjóna BSJ nokkuð stöðugt. Finnst svo gott að grípa í svona lítil verkefni inn á milli þeirra stærri. BSJ er líka uppskrift sem ekki er hægt að fá leið á og býður upp á endalausa möguleika í útfærslum - ólíkt garn, litir rendur, tölur - allt býður upp á óendanlega skemmtilega prjónaupplifun. Þessir tveir eru gerðir úr handlitaða garninu mínu. Sá rauði er úr Nammi - íslensku bandi sem ég lita heima og sel í Nálinni. Sá appelsínuguli er reyndar heimalituð shetlandsull - svoldið harðari útkoma en ofursætur. Tölurnar gera svo gæfumuninn. Þær fást í Nálinni. Ójá.

Tvær húfur

2009-06-13T21:41:00.003Z

Húfur eru skemmtilegar. Passlega litlar og bjóða upp á endalausa möguleika í útfærslum, garni, munstri og svo víðere. Sú blásvarta er úr BC Mohair fiori sem er blanda af mohair og merinoull. Allt annað líf að prjóna með mohair garni sem er ekki akrílblandaður óskundi. Úrtakan á þessari kemur út eins og X á kollinum, frekar brött úrtaka.

Sú græna er úr dönsku, lítið loðnu, mohair garni sem er gert í svo girnilegum litum að maður vill helst borða það. Fyrirtækið sem bjó það til er því miður farið á hausinn, skæl, skæl. Blómin heklaði ég og saumaði á eftirá. Húfan er með þríhyrndri úrtöku á kollinum. Passar á sex ára... eins og ískyggilega margt sem ég prjóna.

Uppskriftir af húfunum eru í vinnslu og verða gefins í Nálinni fljótlega.

Peysan Rúna

2009-05-27T11:39:00.003Z

Peysan Rúna hefur hangið í Nálinni undanfarnar vikur og sogað að sér prjónara sem langar að prjóna hana. Í dag hef ég þær gleðifréttir að færa að uppskriftin er tilbúin og fæst nú í Nálinni. Stærðirnar eru þrjár 3-12 mán, 2-3 ára og 4-7 ára hérumbil. Fullorðinsstærð er í vinnslu - uppskriftin verða fáanleg innan skamms. Prjón og gleði!

Einband og alpaca og yndisleg útkoma

2009-04-22T20:40:00.003Z

Þessi kostar ekki nema tvöþúsundkall í mesta lagi (fyrir utan vinnuna auðvitað). Einbandið er ótrúlega skemmtilegur efniviður og til í mörgum flottum litum - ég hef það fyrir satt að von sé á enn fleiri litum frá Ístex með vorinu. Í þessa peysu fóru um 3 dokkur af einbandi en svo ákvað ég að setja smá lúxuskanta á hana með geggjuðu dönsku alpacagarni. Peysan er þróuð eftir að ég prjónaði FLS - er prjónuð frá hálsi, garðaprjón fram og til baka og ermarnar sléttprjónaðar í hring. Endalausir möguleikar með svona flík!

"Stundum fer ég á fund"

2009-04-16T11:19:00.002Z

Elsku litla stelpan mín hún Rúna Lóa tekur þátt í prjónaæði mömmunnar af fullum hug og hjarta. Henni finnst þetta allt voða spennandi og kann sannarlega að meta að ganga í heimaprjónuðum flíkum. Hún er að læra að puttaprjóna og fékk hjá mér himinbláa léttlopadokku til að æfa sig. Svo fann hún litla tösku til að nota fyrir puttaprjónatösku og sagði ábúðarfull "Stundum fer ég á puttaprjónafund". Tilkynning fylgdi á eftir um að hún hygðist taka myndir af puttaprjóninu til að setja í puttaprjónabókina sína. Ég er auðvitað að springa úr móðurstolti og sé fyrir mér mikinn snilling vera að stíga sín fyrstu prjónaskref. Yndislegt.

Golla á Rúnu

2009-03-31T11:57:00.002Z

Gat ekki setið á mér eftir stórkostlegu uppgötvunina um að peysur á að prjóna frá hálsi og niður... Skil bara ekki að þetta sé ekki útbreiddari aðferð en raun ber vitni. Þessa gollu prjónaði ég á Rúnu Lóu úr Kauni garni sem skiptir litum á leiðinni. Ofursæt á ofursætri stelpu. Byrjaði á 66l, nokkrar garðaprjónsumferðir efst og svo setti ég merki á laskaaukningastaðina - 35% bak og fram og 15% ermar - sirka. Fitjað upp 3l undir handvegi. Stórkostlega einfalt og fallegt. Peysan er með garðaprjón á jöðrum en að öðru leyti slétt. Í stað þess að gera brugðið á röngunni píndi ég mig til að "bakka" eins og er hægt að sjá hér neðst á síðunni undir "knitting back". Svoldið sniðugt.

Kambgarnsgrifflur

2009-03-31T11:53:00.002Z

Ég fékk mér Knitpro sokkaprjóna um daginn og endurfæddist til sokkaprjóns (eða prjóns í hring með 5 prjónum). Þvílíkur munur. Þessir prjónar eru úr birki, mjúkir og fallegir á litinn og hreinlega allt annað að prjóna með þeim. Gerði þessar sætu grifflur úr kambgarni. Sniðugt, hræódýrt garn og til í öllum mögulegum litum.

Arndís með alpacatrefilinn

2009-03-31T11:36:00.002Z

Hér er hjartkær stjúpsystir mín hún Arndís með trefilinn sem ég gaf henni í virðulega fertugsafmælisgjöf um daginn. Chunky alpaca frá BC, 200g, og blóm úr angora, mohair, merino og fairtrade filtkúlum sem við Halldóra keyptum eitt sinn frá Nepal. Stórir prjónar (7 minnir mig), garðaprjón. Mjúkt og gott og sætt á henni.

BSJ á íslensku

2009-03-23T20:10:00.004Z

Nú fæst hin goðsagnakennda uppskrift Elizabeth Zimmermann, Baby surprise jacket, í íslenskri þýðingu í Nálinni á Laugavegi 8. Meg Swansen, dóttir EZ var svo sæt að gefa ykkar einlægri leyfi til að þýða uppskriftina og salan í Nálinni er líka komin í gang í samráði við hana. Einfaldar málin talsvert fyrir íslenska prjónara sem eru að fá ískyggilegan áhuga á BSJ - ekki furða reyndar því peysan er algjört furðuverk og á sama tíma ótrúlega praktísk og falleg flík.
Þýðingin er algjörlega trú upprunalegu útgáfunni, Meg lagði mikla áherslu á það, og þess vegna er hún pínulítið torskilin fyrir þá sem ekki eru vanir uppskriftum EZ - enda var hún með eindæmum líbó prjónakona og lítið fyrir að festast um of í forminu.

Eftir að íslenska uppskriftin fór í umferð hef ég fengið allnokkrar spurningar um ákveðna staði í henni þar sem fólk virðist stranda. Hér koma því nokkur ráð til hjálpar:

Prjónastærð og garnþykkt ráða stærð peysunnar. Lykkjufjöldinn er alltaf sá sami.
Aukningar og úrtökur eru á réttunni - rangan er alltaf prjónuð til baka slétt (nema þegar fellt er af fyrir hálsmál og í hnappagataumferðinni).
Í stað þess að merkja lykkju 36 og 125 má merkja lykkjur nr 35 frá báðum endum, með prjónamerki sitt hvorum megin og gera síðan úrtökur/aukningar alltaf fyrir fyrra prjónamerkið og eftir það síðara á hvorum staðnum. Úrtökurnar má þá gera t.d. með 2l saman, prjónað aftan í öðrum megin og framan hinum megin. Þetta sparar talningar og gerir prjónið fljótlegra.
Útaukningin á fimmta garði - þarna er átt við að 9l eru búnar til við sitt hvorn endann, þ.e. áður en kemur að fyrra úrtökustaðnum og eftir þann síðari. Þetta verða ermaopin og aukningarnar láta ermarnar víkka aðeins.
Þar sem stendur "eftir 22 raðir" er átt við 22 garða.
Útaukning þegar 114 l eru á prjóni - þarna er 10 l bætt við með jöfnu millibili yfir lykkjurnar sem eru innan við hornin sem hafa myndast. Athugið að halda áfram að auka út 2 lykkjur sitt hvorum megin við merktu lykkjurnar líkt og fyrr þar til 158 lykkjur eru á prjóninum (=168-10l).
Þegar búið er að prjóna garðana 10 í miðju stykkisins eru lykkjur fyrst teknar upp á réttunni og prjónað til enda. Svo prjónað til baka (á röngunni) - en þá þarf að passa að lykkjurnar séu teknar upp frá sömu hlið svo útkoman verði falleg. Mér finnst gott að nota heklunál við þetta.
EZ er klók kona sem ráðleggur að gerð séu hnappagöt báðum megin -og svo hnappar saumaðir yfir götin á pólítískt réttum stað þegar vitað er hvort krílið sem á að fá peysuna er stúlka eða drengur. Þetta er auðvitað óþarfi ef peysan er prjónuð á kríli sem er þekkt stærð að þessu leyti.
Hér er að finna gagnlegasta hjálparplaggið sem ég hef rekist á á netinu. Þeir sem eiga uppskriftina skilja það og geta notað - eins og ráðin hér að ofan - þeim sem eiga hana ekki ráðlegg ég að festa kaup á henni hið snarasta. Athugið að uppskriftin er varin höfundarrétti og ljósritun, skönnun eða önnur dreifing er ólögleg.

Fyrsta peysan sem ég prjóna á MIG

2009-03-19T21:48:00.003Z

Já það er satt! Ég hef aldrei nennt að prjóna peysu á sjálfa mig... amk ekki peysu sem ég hef klárað og notað. En þessi uppskrift hennar Pam af Dömupeysu í febrúar (sjá að neðan) var svo djúsí að ég gat ekki haldið aftur af mér. Og hér er hún komin - reyndar löngu komin því ég kláraði hana að sjálfsögðu í febrúar - og nú þegar búið að nota hana mjög mikið. Garnið er grasgræn Shetlandsull frá BC (sem reyndar var þegar prjónað í hálfpeysu sem ég nennti aldrei að taka upp) og með henni tók ég kidmohair þráð í svoldið mosabrúnum lit. Prjónar númer fimm. Þeir sem þekkja uppskriftina vita að peysan er prjónuð ofanfrá, þ.e. fitjað upp á hálsmálið, og mér finnst það eina vitið í peysuprjóni. Maður hefur miklu betri yfirsýn yfir það sem er í gangi í prjóninu og getur mátað og látið peysuna passa svo miklu betur en með neðanfrá aðferðinni.

BSJ með rauðkáli

2009-03-16T17:19:00.004Z

Þessa yndislegu litlu stelpu á hún Ásta vinkona mín. Hún fékk þessa peysu frá mér (BSJ) um daginn þegar ég fór með gömlu hjúkkuvinkonum mínum yfir Hellisheiðina hræðilegu að hitta Ástuna okkar. Peysan er prjónuð úr mjúku og fallegu Silkbloom frá BC, sem fæst í Nálinni. 45% silki og 55% merinoull. Prjónar númer 4.5. Tölurnar eru eins og rauðkál - í raun eru þær pínulitlar en á myndinni virðast þær miklu stærri því litla stelpusnúllan er svo oggulítil.

BSJ #1

2009-02-19T18:02:00.003Z

Þetta er fyrsta Baby surprise peysan sem ég kláraði. Hún fór í jólapakka til Sögu litlu sætu frænku minnar í Uppsala. Í panikki kvöldið fyrir brottför þangað náði ég að mynda hana á eldhúsgólfinu (í rökkri, á símann). Garnið er hið undurmjúka Lucca merino frá BC, sem fæst að sjálfsögðu í Nálinni. Tölurnar eru líka þaðan - þær eru sítrónusneiðar. Skemmtilegasta prjón í heimi!!

Dömupeysa í febrúar

2009-02-19T13:51:00.002Z

February lady sweater er æðisleg uppskrift eftir Pam Wynne sem hefur náð mikilli útbreiðslu á skömmum tíma - sérstaklega í gegnum http://www.ravelry.com/ (ef þú ert að lesa þetta og ert ekki á Ravelry ætla ég að biðja þig lengstra orða að drífa þig þangað inn). Pam er líka með mjög skemmtilega prjónasíðu. Ég fékk leyfi hjá Pam til að þýða uppskriftina yfir á íslensku - henni fannst það æði! Smelltu hér til að nálgast hana.

Skrímslabolur Tabitó Þórs

2009-01-13T16:55:00.003Z

Litli sæti bróðursonur minn sem á heima í Tokyo fékk þennan sæta skrímslabol í jólagjöf. Ég kaupi oft einfalda bómullarboli á útsölum og á þá til í skúffu... svo þegar jól og afmæli koma sauma ég í. Mjög oft nöfn barnanna - sjá neðar á blogginu - en núna er ég líka farin að sauma litlar fígúrur eins og þetta sæta skrímsli. Það er með pallíettuaugu og tölur á fálmurunum.

Mögguslá

2009-01-12T20:20:00.003Z

Elsku Magga frænka í Uppsala fékk gataslá í afmælisgjöf. Uppskriftin er í "Slip maskerne lös" hinni stórkostlegu bók eftir Lotte Kjær. Sláin er þessi bleika á forsíðunni. Hér í svörtu mohair bouclé frá BC garn (Nálin), sést ekkert gasalega vel... nema að hún er mjög smart flík. Ég náði að mynda hana áður en hún fór í pakkann á menningar- og handverksheimili Halldóru Sk. í Vallentuna. Fyrirsætan er ég.

Lítið lopasjal handa Ernu

2009-01-12T20:08:00.002Z

Erna góða stjúpa fékk þetta lopasjal. Uppskriftin er lítið lopasjal úr hinni goðsagnakenndu bók "Þríhyrnur og langsjöl". Tvöfaldur plötulopi og loðband sem skiptast á 2 og 2 umferðir. Munstrið er krónuprjón og í raun ótrúlega einfalt miðað við hvað útkoman er falleg. Það eina sem maður þarf að kunna er að slá bandinu upp á prjóninn, prjóna tvær saman, slétt og brugðið... ekki flókið.

Helga mín fékk silkikraga

2009-01-12T20:05:00.002Z

Uppskriftin er í Prjóniprjón. Garnið er dásamlega handspunna himalaya silkigarnið frá BC garn (Nálin). Þessi uppskrift er svo fín ef garnið er frekar gróft og óreglulegt, þykkt og þunnt á víxl. Malabrigo er æði, líka point five frá Colinette. Helga var voða kát og byrjaði strax að nota kragann.

Jólagjafir: Álfrún krútt fékk jólasveinahúfu

2009-01-12T19:56:00.002Z

Uppskriftin er sirka svona:
Garn: Angora (hvítt), Loðband/einband (rautt)
Prjónar: 40 cm hringprjónn nr. 6 og sokkaprjónar nr.6 – eða langur hringprjónn nr. 6.
Stærðir: 0-2 (3-5 ára) 5-10 ára (fullorðins)
Ath. mjög gott er að prjóna húfur á langan hringprjón (100 cm eða lengri). Þannig þarf ekki að skipta yfir á sokkaprjóna þegar húfan þrengist efst.
Aðferð:Fitjið upp 45 (50) 60 (70) lykkjur með tvöföldu hvítu angoragarni á prjón númer 6. Tengið í hring og byrjið að prjóna stroff: 3 sléttar og 2 brugðnar til skiptis. Þegar stroffið mælist 5(6)7(9) cm er skipt yfir í rauða garnið (tvöfalt loðband/einband) og prjónuð ein umferð slétt. Í næstu umferð er aukið út um 3(4)4(5) lykkjur jafnt yfir umferðina (hafið um það bil jafn margar lykkjur á milli, annars þarf þetta ekki að vera svo nákvæmt). Aukið út svona: takið bandið milli lykkjanna upp á vinstri prjóninn, prjónið í það snúið, þannig myndast ný lykkja.
Urtökur:Þegar húfan mælist 14 (15) 16 (18) cm: Prjónið 2 l saman 5(6)6(7) sinnum með jöfnu millibili í næstu umferð.
Þegar húfan mælist 17(19)20(23) cm: Prjónið 2l saman 4(5)5(6) sinnum með jöfnu millibili í næstu umferð.
Þegar húfan mælist 22(23)25(30) cm: Prjónið 2l saman 4(5)5(6) sinnum með jöfnu millibili í næstu umferð.
Þegar húfan mælist 25(27)29(35) cm: Prjónið 2l saman 4(5)5(6) sinnum með jöfnu millibili í næstu umferð.Hér eftir eru úrtökur með 2 cm millibili – 2-4 sinnum í hverri úrtökuröð fyrir allar stærðir þar til alls 6-10 l eru eftir á prjónunum. Prjónið þá 2 og 2 saman út umferðina – slítið bandið og dragið í gegnum lykkjurnar sem eru eftir.

Kannski furðar einhver sig á birtingu jólasveinahúfuuppskriftar nú rétt eftir áramótin - þetta er samt einmitt rétti tíminn til að prjóna húfur fyrir næstu jól til að sleppa við tímapressu og panikk þegar fitjað er upp um miðjan desember næstkomandi... Fyrirhyggja!

Prjóniprjónaævintýri

2009-01-12T16:34:00.002Z

Vá maður! Síðan síðasta innlegg var skrifað hefur öll prjónaorka farið í útgáfu Prjóniprjóns (og reyndar slatti í jólagjafaprjón - birti afrakstur hér fljótlega). Viðtökurnar hafa líka verið dásamlegar og salan framar villtustu vonum. Prjóniprjón lenti í mörgum jólapökkum og ég veit um nokkra sem vonuðust eftir henni en fengu ekki og skiptu þess vegna einhverju öðru í Prjóniprjón. Það yndislega við prjónara er ólæknandi árátta þeirra til að deila með sér. Flestir sem byrja að prjóna breytast í einhvers konar prjónatrúboða og tala stöðugt um prjón og garn og uppskriftir og prjóna og tölur og kanta og nýjar uppáfitjunaraðferðir og prjónablogg og prjónavídeó og blöð og bækur. Þetta hefur verið algjör lykill að velgengni bókarinnar því ekki höfðum við Halldóra mikið auglýsingafé milli handanna. Við erum þegar komnar með helling af efni í næstu bók og erum að plana þýðingu á þeirri fyrstu yfir á ensku. Þúsund þakkir og kossar til allra prjóniprjónara - munið líka að mynda prjónaverkin og senda okkur á prjoniprjon@gmail.com - við birtum myndir og sögur á http://www.prjoniprjon.blogspot.com/. Lifi prjónið!

Bókin kemur út í byrjun desember - jeij!!

2008-11-14T18:24:00.002Z

Stundin nálgast! Bókin á að heita "Prjóni prjón" og kemur út eftir sirka 3 vikur. Ætti að ná í jólapakka hjá einhverjum prjónurum... Kjörorðin eru innblástur, einfaldleiki og frelsi frá uppskriftum. Við viljum semsagt veita byrjendum kjark og þor og einföld en jafnframt flott verkefni til að spreyta sig á - hina sem eru lengra komnir viljum við frelsa úr viðjum uppskrifta og hvetja áfram í sköpunargleðinni. Tókum 300 myndir í gær... ein hér að ofan. Get ekki beðið!!

Lítið poncho

2008-11-09T22:28:00.003Z

Prjónað á prjóna númer 5 - garn sem hendi er næst. Er í stærð fyrir 2-4 ára en fyrirsætan er 5 ára - hefði prjónað aðeins stærra á hana. Eitt kvöld og hálftími daginn eftir. Uppskriftin verður að sjálfsögðu í prjónabókinni.

Bókin kemur

2008-11-09T18:54:00.002Z

Prjónabókin okkar Halldóru (Sk) kemur út fyrir jólin!!! Við erum búnar að undirbúa bókina og ganga með hana í maganum í rúmlega tvö ár... Bókin verður seld fyrst og fremst þar sem hægt er að kaupa garn. Fylgist með!! Á myndinni er Rúna í fínu lopapeysunni - uppskriftin verður í bókinni ásamt um það bil 29 öðrum.

Einfaldur plötulopi

2008-11-03T22:06:00.003Z

Þessi er ekkert smá vel heppnuð!! Mín eigin hönnun og uppskriftin verður birt í væntanlegri prjónabók minni og Halldóru Sk. Reyndar er hún svo geðveikislega einföld og fljótleg að þið munduð fá kast ef þið bara vissuð. Rúna ákvað að hafa blátt hekl kringum hálsmálið og bleikt á ermum. Tek mynd af henni í peysunni á morgun. Sá misskilningur hefur lengi riðið húsum á Íslandi að einfaldur plötulopi sé allskostar ónothæfur í flíkur. Það er hin mesta firra og líklega skoðun sem átti rétt á sér í gamladaga þegar börn (og aðrir) áttu kannski tvær peysur til skiptanna en ekki tuttugu eins og börn nútildags. Dagný ofurprjónakona hefur vitað þetta lengi og er búin að prjóna margar fínar peysur úr einföldum. Svona býr maður til hræódýrar og ofursmart flíkur.

Myndataka í haustinu

2008-11-02T23:51:00.002Z

Í dag fórum við út í garð. Maren módel, Bergur myndasmiður og ég stílistinn. Tókum helling af myndum sem nú eru komnar hingað á bloggið. Rakur og dimmur dagur í Reykjavík. Útkoman samt furðugóð. Þessi hér er lýsandi.

Bleika fína hyrnan mín

2008-11-02T23:46:00.003Z

Prjónaði þessa um leið og ég prjónaði hyrnuna á Rúnu Lóu (sjá hana neðar á blogginu). Prjónar númer 8 og ullin sem er lituð í Eistlandi og fæst í Marias Garn í Stokkhólmi. Mér þykir sérstaklega vænt um þessa hyrnu því ég prjónaði hana að stórum hluta í eldhúsinu hjá henni Röggu minni á Framnesvegi í janúar 2007. Í hverri lykkju er sorg og hlýja því þá var Jói nýfarinn frá okkur öllum. Búin að nota hana sjúklega mikið. Hér er Maren sæta með hana.

Blátoppur

2008-11-02T23:40:00.002Z

Ein frelsishúfa prjónuð úr mohair garni sem er með lykkjum svo að útkoman verður mjög flöffí og teygjanleg. Rauða og bláa garnið er Fiori mohair sem er mikið uppáhald hjá mér. Fiori er blanda úr mohair og merinoull. Yfirleitt er mohairgarn blandað með einhverjum gervióskunda en þetta er allt annað líf. Allt önnur tilfinning að nota og snerta.

Silki, namminamm

2008-11-02T23:34:00.002Z

Helga skrapp til Ameríku í sumar og keypti handa mér æðislegt silkigarn sem selt var til styrktar kvennabaráttu í Nepal. Ég gerði úr þessu flottan trefil með rússnesku hekli. Myndin sýnir hvað garnið er sjúklega flott. Litirnir líka mjög ég.

Fjölnota

2008-11-02T23:28:00.003Z

Hver man ekki eftir græna ponchoinu sem ég prjónaði á Rúnu 2006? Neðar á blogginu má sjá myndir af því ásamt lýsingu og monti. Nú komst ég að því að Maren er alveg jafnsæt í því. Þetta er því flík sem getur vaxið með eigandanum eða öll fjölskyldan getur skipst á að nota.

Bestu ermar í heimi

2008-11-02T23:20:00.003Z

Ég er nú aldeilis hress hér með ermarnar mínar! Helga Jóna, prjónagyðja í Nálinni, á þessa uppskrift, en hún birtist í Húsfreyjunni. Eiginlega er þetta stykki, eins og breiður trefill sem tölur eru settar á, og svo er hægt að hneppa þessu á ýmsa vegu um kroppinn. Slétt prjón og mjög flott gataprjón skiptist á. Þegar ég var búin að nota fyrirbærið sem ermar í heila viku ákvað ég að taka tölurnar af og sauma saman svo úr yrðu almennilegar ermar. Ég nota þetta mjööög mikið. Garnið er handspunnið alpaca, ótrúlega lifandi og skemmtilegt garn með miklum litabrigðum. Því miður er það ekki lengur í framleiðslu :(

Regnbogahúfa

2008-11-02T23:12:00.003Z

Held svoldið upp á þessa. Hún er prjónuð úr Noro kureyon sem skiptir að sjálfsögðu litum eins og regnboginn. Ég notaði með því mohair í ýmsum litum og lét Norolitina ráða því hvaða mohairlit ég notaði. Byrjaði á Noro, prjónaði smá þar til ég var komin að lit sem ég átti í mohair... og svo koll af kolli. Kom mjög vel út. Húfan er sáraeinföld, 2sl, 2br alla leið og tekið úr uppi á kolli. Aðferðin er hér að neðan við aðra Norohúfu. Maren á hana.

Ein hyrnan enn

2008-11-02T22:27:00.003Z

Þessi er dásamleg. Prjónuð úr Kauni - garni sem skiptir litum á leiðinni - fæst í Nálinni í ótal og ægifögrum litum, á prjóna númer 6 og hálft. Þriggja kvölda verkefni og frekar heilalaust svo að þetta er gott verkefni fyrir sjónvarpskvöld. Lýsingu á aðferðinni er að finna neðar hér á blogginu. Litir í hyrnunni eru grár, svartur og fjólublár. Algjörlega ég, enda er hún handa mér. Maren er bara svo framúrhófi sæt að hér pósar hún. Held að sumir fái svona í jólapakkann í ár.

Tvær frelsishúfur

2008-11-02T22:20:00.003Z

Þessar prjónaði ég á árinu (2008) sem sýnishorn fyrir frelsishúfunámskeið sem ég hélt í Nálinni. Sú gráa er úr merinoull (Lucca, fæst í Nálinni), hún heitir fjall, enda með snæviþöktum toppi. Hin er úr dásamlegu hnausþykku alpacagarni (Nálin líka). Hauskúpa saumuð í með silfurgarni. Þetta eru svona dæmigerðar klukkutímahúfur, heklað á grófa nál og frábærar að töfra fram ef manni er boðið í afmæli með óvenjustuttum fyrirvara. Prjónasúpermódelið er Maren systir.

Grænn og fínn

2008-11-02T22:14:00.005Z

Þennan prjónaði ég fyrir rúmu ári þegar við afplánuðum 2 vikur á fínu hóteli í Stokkhólmi í bið eftir að flytja heim til Íslands. Uppskriftin er frá Ninu Sagulin í Nysta í Stokkhólmi. Ein girnilegasta prjónabúðin þar. Maren gullfallega systir mín er prjónamódelið.

VÍG (verkefni í gangi)

2008-10-28T10:35:00.005Z

Það er semsagt hellingur á prjónunum og kannski meira en endranær því ég hef verið óvenju sjúk í að byrja á nýjum hlutum. Hér er sýnishorn:
Baby surprise jacket - karrígul og hvít, bara eftir að setja tölur og sauma ermasaumana.
Baby surprise jacket - bleik og hvít. Fjórðungur búinn. Verður lítil og sæt.
Grá lopapeysa, einfaldur plötulopi- garðaprjón á búk og ermar + axlir prjónað í einu stykki eins og trefill. Er að sauma ermar við búk. Verður ýkt fín á Rúnu.
Fjólublá laskaermapeysa úr einföldum plötulopa - á mig og tekur þess vegna svooolið langan tíma.
Bleik merinópeysa á mig - prjónuð úr æðislegu smá yrjóttu merinógarni frá Helgu Jónu í Nálinni.
Vettlingar á 5 ára - handa barni á munaðarleysingjaheimili í Úkraínu. Fer í jólapakka. Rúna voða spennt. Prjóna hér tvo vettlinga í einu á einn langan prjón. Svokölluð magic-loop aðferð.
Lopapeysa á Berg - tvöfaldur plötulopi, léttlopi í munstur - næstum komin að munstrinu. Líka þolinmæðis því Bergurinn er stór.
Sjal handa mér - úr hinu frábæra Kauni garni sem fæst í Nálinni. Skiptir litum og er svart grátt og fjólublátt - klára það í vikunni.
Sjal handa Ernu - uppskriftin heitir lítið lopasjal og er úr hinni goðsagnakenndu bók Þríhyrnur og langsjöl. Ég nota vínrauðan plötulopa og loðband í næstum sama lit. Kannski geri ég ermar úr þessu - það yrði ljómandi fallegt. Á sirka 1/3 eftir.
Svo er ég að fara að taka jólagjafagerðina í gegn.

Meira Noro

2008-10-28T10:02:00.003Z

Jæja. Ég er alltaf jafnskotin í Noro garni. Það er samt asskoti dýrt svo að risastórar flíkur eru kannski ekki alveg á dagskránni. Hins vegar finnst mér mjög gaman að blanda saman Noro og íslenska lopanum. Lopinn er auðvitað til í öllum litum regnbogans og norogarnið gerir flíkurnar helmingi meira spennandi. Þessa peysu prjónaði ég á Rúnu Lóu sem notaði hana mikið. Í henni er reyndar þunnur mohair þráður með 2földum plötulopa og svo noro í stroffum og kraga. Lopinn er prjónaður á prjóna nr 7 minnir mig en svo skipti ég í prjóna nr 5 þegar ég fer yfir í noro - í kraganum t.d. er lykkjufjöldinn tvöfaldaður þegar noro tekur við - þetta er vegna þess að noro garnið er fínna en lopinn í þessu tilfelli. Stroffin á höndum eru höfð óvenju löng - þannig er hægt að nota peysuna helmingi lengur en ella á stækkandi krakka. Á myndinni er Númi í peysunni en nú er hún á förum til Japan þar sem Tabito bróðursonur minn mun taka við henni. Það er auðvitað einstaklega vel við hæfi þar sem hann er íslendingur og japani - rétt eins og peysan.

Skott með Noro húfu

2007-09-14T10:12:00.000Z

Hér er mín yndislega dóttir með einfalda húfu úr Noro Silk Garden garni. Noro garnið er japanskt og alveg dásamlega fallegt, marglitt og fínt. Húfan er prjónuð á klukkutíma (enn eitt verkefnið fyrir þá sem vilja snögg afköst og ekkert vesen), og er sáraeinföld: prjónar nr. 4,5, fitjað upp sirka 70l (farið bara eftir prjónfestu, svo er bara prjónað 2sl og 2br næstum upp allan hausinn, svo teknar 2br saman einn hring, prjónað smá svo teknar 2sl einn hring og svo 2 og 2 saman þar til örfáar l eru eftir og bandið dregið í gegnum þær. Frábært að nota svona Noro garn því húfan lítur út fyrir að vera prjónuð með milljón mismunandi litum og allir halda að prjónarinn sé algjör snillingur.

Respect Helga

2007-09-14T10:09:00.000Z

Viljiði sjá þetta dásamlega teppi sem hún Helga Harðardóttir ofurprjónaljósmóðir og vinkona mín gerði. Ég sat svona í sæluvímu og gat vart mælt í lengri tíma þegar ég fékk það í hendurnar. Þetta er á minni prjónadagskrá fyrir veturinn 07-08, ekki spurning! Helga er annars mikil fyrirmynd í prjónaskap og hefur töfrað fram ótrúlega fallegar og flóknar flíkur. Það er líka sagt að prjón sé agalega góð iðja fyrir ljósmæður... næmi í fingrum.

Húfa fyrir mig

2007-09-13T20:33:00.000Z

Bleika garnið er mjúkt og gervi en samt alveg ómótstæðilegt, fékk það í Knitlab. Þetta er ósköp venjuleg frelsishúfa gerð úr mohair og þessu bleika og einhverju smá glimmeri (alltaf gott að hafa glimmer með), hekluð á grófa nál - númer 8 kannski. Svoldið víð neðst... held ég þrengi hana aðeins fyrir veturinn. Það er nefnilega snilldin við frelsishúfurnar... alltaf hægt að hekla neðan á þær ef þær tildæmis þurfa að lengjast eða þrengjast.

Kjóll fyrir sæta stelpu

2007-09-13T20:30:00.000Z

Þennan kjól prjónaði ég í vor (07) úr frekar þykku bómullargarni frá Knitlab í Stokkhólmi. Blómið er úr einhverju mohair með perlu í miðjunni. Hlírar og kantur úr einhverju loðnu og þykku alpaka garni sem ég fékk á útsölu dauðans í Nysta. Álfrún litla sæta skott fékk kjólinn. Þessi kjóll er prjónaður á klukkutíma... I kid you not!

Pils á dag

2007-04-09T19:38:00.000Z

Þetta pils var prjónað á nokkrum klukkutímum. Prjónar nr. 6 og allskonar garn. Byrjað neðst með 108 l, tekið úr á ca. 7cm fresti 8-10 hver lykkja. Teygja í mittið. Sjúklega fljótlegt og einfalt.

Trefill úr Colinette

2007-04-09T19:18:00.000Z

Þetta prjónamunstur rakst ég á í nýju prjónabúðinni Knitlab sem var að opna á Söder. Ég píndi búðarkonuna til að kenna mér og fór svo beint heim að prjóna. Þetta lítur út fyrir að vera flóknara en það er... ég lofa! Kemur ekkert smá vel út með þessu garni sem er mislitt og misþykkt og einstaklega mjúkt. Við Rúna eigum þennan saman. Passar bundinn á hana og nældur eins og kragi á mig.

Rúna í silkikjól

2007-04-09T19:16:00.000Z

Hér er elsku litla skottan mín í fína silkikjólnum. Mjög ánægð með hann enda bleikur og glimmer.

Hálflingar

2007-04-06T20:12:00.000Z

Mér datt í hug að prjóna eitthvað fljótlegt og ákvað að gera handstúkur/mudda (það er svona úlnliðastroff oft haft með einhverju skrauti). Prjónar nr. 9, fjórfaldur plötulopi, fitjað upp á 18l, 2sl og 2br prjónað sirka 7cm. Aukið út 2l og haldið áfram að prjóna slétt. Þarna ákvað ég að gera ekki mudda heldur hálfvettlinga í staðinn. Prjónað að þumli, þá felldar af 3l fyrir þumalgat. Í næstu umf er bandi slegið upp á 2x f ofan affelldu lykkjurnar. Í umf þar á eftir eru uppslættirnir prjónaðir aftan í bandið og aukið í 2l annars staðar í hringnum. Prjónað áfram þar til nær fram á puttana og fellt af br. Heklað utanum fingraop og þumalop með einhverju smart effektgarni. Ég notaði sjúklega mjúkt og flott bleikt nælongarn sem heitir Amelie. Mohair, glimmer, eyelash, ribbon eða hvað sem er væri fínt í þetta. Svo er hægt að skreyta með pallíettum, perlum eða einhverju fíneríi... það fer svo vel við grófa ullina. Sá græni er úr 2x plötulopa, aðeins minni. Hvíta er mohair.

Möbíus Ragnheiðarson

2007-04-06T13:55:00.000Z

Jæja hér er hann. Mér fannst hann orðinn eitthvað svo breiður að ég felldi af þrátt fyrir eiga eftir slatta af garninu. Svo reyndist hann vera ansi mjór greyið, en fallegur að sama skapi. Ég er búin að nota hann helling tvívafinn um hálsinn. Samt er planið að rekja upp affellinguna og prjóna restina af garninu. Svona við tækifæri.

Ég er snillingur!

2007-04-05T21:46:00.000Z

Nú er ærin ástæða til monts. Ég er búin að prjóna fínasta stelpukjól í heimi á elsku litlu Rúnu mína. Kjóllinn er hannaður af mér sjálfri... jafnóðum meira að segja. Hann er að mestu úr silkigarni sem er prjónað slétt ásamt bleikum glimmerþræði. Kantur og hlírar að ofan og kanturinn að neðan eru úr ekólógískri bómull (regnbåge) sem er handlituð. Ein rönd af marglitu borðagarni er á milli silkisins og bómullarinnar að neðan. Ég er svooo ánægð!!

Svona gerði ég kjólinn:
Hringprjónn 40 cm nr. 5.5. Fitjað upp 110l með bómull. Prj sl fram og til baka 3 cm. Tengt saman í hring og pr 2 umf sl. Miðjulykkja fundin og merkt. Nú er aukið í sitt hvorum megin við miðjulykkju með því að slá bandi upp á prjóninn báðum megin við miðjulykkjuna og prjóna allar lykkjur sléttar í næstu umf. Þetta er gert 4x. Svo er prjónað og prjónað eins lengi og maður hefur þolinmæði til. Þegar mál er að linni kemur svo ein umferð með borðagarni - hér væri líka smart að nota annað effectgarn s.s. mohair, eyelash eða salsa. Svo er skipt yfir í bómullina aftur. 1 umf sl. Í næstu umf er prjónað 2x í hverja lykkju, framan og aftan. Prjónað sl ca 2 cm og endað á 3 umf sem eru pr 2sl og 2br til skiptis. Fellt af. Hlírar prjónaðir síðast. Ég notaði pr nr 2.5 og tók upp 12 l sitt hvorum megin 6l frá miðju. Pr sl 47 umf og fellt af. Hlírar saumaðir fastir að aftan, bilinu efst lokað og gengið frá öllum endum.

Ég get ekki beðið eftir að láta Rúnu prófa á morgun þegar hún vaknar.

Verkefni í gangi

2007-03-28T08:32:00.000Z

Ullarvestið sem ég nefndi í síðustu færslu er nánast tilbúið - á bara eftir að festa hlírana og ganga frá nokkrum endum. Mynd kemur þegar þessu er lokið. Svo er ég byrjuð á sjali handa Ernu. Rauður lopi og rautt loðband, mjög smekklegt og fínt, uppskrift úr "Þríhyrnur og langsjöl" - þetta er sumsé langsjal prjónað með krónuprjóni. Vorið er síðan að bera mig ofurliði, léttara garn verður girnilegt og ómótstæðilegt. Varð mér úti um silkigarn í gær og smá handlitaða bómull - fitjaði uppá og er að prjóna kjólgopa á Rúnuskott. Er dálítið metnaðarfull því ég ætla að reyna að klára kjólinn fyrir afmæli Haraldar nk laugardag (í dag er miðvikudagur og ég er komin ca 10cm... ehm). Svo mun ég mynda og blogga strax og kjóllinn er til.

Ekólógískur sumartoppur

2007-03-18T18:22:00.000Z

Hér er kominn þessi sæti sumartoppur (eða vesti) sem Rúna Lóa ber svona glæsilega. Bómullargarn og prjónar númer sirka 3.5, uppskriftin heimatilbúin... en skrifuð samviskusamlega á blað!!! Garnið er mjög skemmtilegt, ekólógísk bómull handlituð, bleiki liturinn er svo fjöldaframleidd egypsk bómull. Hlírar prjónaðir eftirá með I-cord aðferð (ehm þetta er líklega svoldið nördalegt, sérstaklega vegna þess að þetta hugtak er ekki einusinn skýrt á wikipedia- ég biðst forláts - en þetta er mjög einfalt). Ætla að nota sömu "uppskrift" í ullartopp/vesti, byrjuð á því.

Hinn töfrandi Möbíus

2007-03-11T21:58:00.000Z

Prjón er þess eðlis að nýjar uppgötvanir gefa prjónaranum ótrúlegt kikk og oft á tíðum fölskvalausa gleði. Til eru ýmsar goðsagnir tengdar nútímaprjónaskap, margar runnar undan rifjum Elizabeth Zimmerman (EZ) sem er Yoda/Mr. Myagi prjónsins. Ein þeirra er Möbíus sjalið. Margir þekkja möbíusinn úr stærðfræðitímum unglingsáranna þegar maður var látinn klippa pappírsræmu og snúa henn hálfhring og líma endana saman - með þessu myndaðist fyrirbæri sem hefur aðeins eina hlið og einn kant... fyrirbæri sem er "unorientable", formfræðileg ráðgáta. Snillingurinn hún EZ fann út hvernig mætti prjóna fyrirbærið og í dag er það heilög skylda hverrar prjónakonu með sjálfsvirðingu að læra að prjóna möbíus. Ég mun að sjálfsögðu birta mynd af afrakstrinum fyrr en varir.

Fljúgandi prjónandi

2007-03-07T14:10:00.000Z

Spurning: Ætli það sé þorandi að fara með prjónadót í flug? Er búin að spá mikið í þetta en hef ekki þorað að prófa. Það væri óbærilegt að þurfa að skilja eftir fínt par af prjónum í haug með vasahnífum, naglaskærum og alls konar skrani. Kannski skiptir máli hvort um er að ræða 30 cm stálprjóna númer 2.5 (fyrir óinnvígða má geta þess að slíka prjóna væri hægt að nota til að myrða heilt cabincrew) eða heklunál úr tré númer 15 (sem er svo stór og sver að margir hrökkva við að sjá hana og halda að hún sé ætluð til einhvers annars og meira prívat athæfis en handavinnu).

Á prjónunum

2007-03-05T20:54:00.000Z

Það er að sjálfsögðu hellingur á prjónunum. Hér er eitt sýnishorn, garðaprjónað sjal úr þreföldu kid mohair, prjónað á hlið á prjóna nr 15. Reyndar má geta þess að svona risaprjónar beinir eru ekkert rosalega sniðugir fyrir herðarnar, þeir eru svo stórir að axlirnar lyftast upp og spennast óþarflega. Ég mæli því með hringprjónum þegar hægt er. Nefna má fleiri stykki á prjónum s.s. hyrnu úr texasullinni, alpaca garðaprjónspeysu á Rúnu Lóu, opal sokkana sem eru hér á blogginu og lopapeysuna á Rúnu og svo lopapeysu á Birnu sem er vinkona hennar Babyborn Rúnudóttur. Ég er með alvarlegt tilfelli af sjúkdómnum "startitis". (sjúkdómnum var fyrst lýst af prjónagyðjunni Stephanie Pearl-McPhee, sem hardcore prjónarar þekkja undir nafninu Yarn Harlot) Hann lýsir sér í óstjórnlegri þörf til að byrja á nýjum og nýjum prjónaverkefnum. Þegar best lætur fær prjónarinn regluleg "finishitis" köst, en þá er það þörfin til að klára verkin sem knýr hann áfram. Sköpunarþörfin ber mig ofurliði mörgum sinnum á dag og rænir mig svefni. Í alvöru - stundum á ég erfitt með að sofna á kvöldin vegna óra um nýjar flíkur og girnilegt garn.

Smitandi athæfi

2007-03-05T20:24:00.000Z

Hyrnurnar mínar eru svo ljómandi fallegar og litirnir í garninu svo töfrandi að fólk í Stokkhólmi er unnvörpum að kasta sér út í prjónaskap. Tökum dugnaðarforkinn hana Lóu Guðrúnu Davíðsdóttur sem dæmi. Hún er farin að velja prjónana fram yfir klósettferðir, svefn og ljúffengar máltíðir. Afraksturinn er líka stórkostlegur. Tvær risastórar hyrnur komnar í heiminn og fleiri á leiðinni. Nú þarf ég bara að passa upp á að kenna henni eitthvað annað svo hún fái ekki hyrnuasperger. Fyrir áhugasama fylgir hér uppskriftin: Fitjið upp 7 lykkjur, prjónið slétt eina umferð, prjónið næstu umferð og aukið út eina lykkju fyrir innan tvær fyrstu og tvær síðustu. Aukið er með því að slá bandinu upp á prjóninn - þá verður til ný lykkja sem er prjónuð í umferðinni til baka. Prjónið til baka, nú eiga að vera komnar 9 lykkjur á prjóninn. Merkið nú miðjulykkjuna með bandi í öðrum lit. Nú er haldið áfram að prjóna og aukið í 4 lykkjur í annarri hverri umferð, þ.e. bandi slegið upp á fyrir innan 2 fyrstu og 2 síðustu lykkjur, og líka sitt hvorum megin við miðjulykkjuna. Þannig vex sjalið niður á við og út á við. Byrjunin er sem sagt miðjan efst við hálsinn. Þegar sjalið er orðið nógu stórt er fellt laust af. Ef maður er í svaka stuði er svo hægt að hekla eitthvað smart kringum sjalið í lokin.

Búkonan litla

2007-03-05T19:12:00.000Z

Í fyrsta sinn með snúð í hárinu. Innblásið af þætti um lítil kínversk skólabörn. Þar lærðum við margar nýjar hárgreiðslur. Hér er hún með vestfirsku hyrnuna sem er prjónuð úr sænskri ull sem er spunnin í eistlandi. Ullin er handlituð svo að útkoman er æsispennandi - ekki hægt að sjá fyrirfram hvernig litirnir verða. Þetta sjal er hún búin að vera með bundið um sig í frosthörkunum undir útigallanum... og eiginlega bara stöðugt. Hún er mjög ánægð með það.

Hamin nákvæmni

2007-03-05T14:35:00.000Z

Halldóra Hnykill prjónavinkona (og almenn vinkona mín) í Stokkhólmi er mjög mikið að reyna að pína mig til að skrifa niður uppskriftir fyrir dótið sem ég prjóna og hekla. Nú hefur henni tekist ætlunarverkið því ég hef nákvæmlega skráð hvernig þetta guðdómlega poncho var búið til. Haldið ykkur fast; eftirfarandi garn var notað: Rowan silk tweed í grasgrænum lit, grænt kid mohair, þrír grænir litir af loðbandi, ljósgrænn plötulopi, grænt Sandnes Tove garn, gullgarn og marglitt salsagarn. Púff... Garnið nota ég í mismunandi samsetningum, 2 eða 3 þræði saman. Með þessu fæst skemmtileg og óregluleg áferð. Prjónar númer átta efst og svo númer tíu, tvö eins stykki prjónuð og saumuð saman eftirá. Semsagt byrjað efst fitjað upp 25 l og prjónað 2 cm, miðjulykkjan fundin og merkt. Svo byrjað að auka í, 2 l í annari hvorri umferð - sitt hvorum megin við miðjulykkju. Ég jók í með því að prjóna framan og aftan í lykkjuna, en það má svosum nota aðrar aðferðir. Eftir 19, 24 og 28 cm var svo tekið úr fyrir axlir, þ.e. tvær fyrstu og tvær síðustu lykkjur prjónaðar saman (alls þrisvar. Þegar tekið er úr er samt haldið áfram að auka í við miðjulykkjuna. Þegar stykkið er orðið ca 35 cm eru prjónaðir 2 cm neðst án þess að auka í. Svo fellt af með skrautlegu garni. Ath að það má víxla sléttu og garðaprjóni til að búa til skemmtilega áferð.

Poncho aldarinnar

2007-03-05T14:09:00.000Z

Ég var búin að prjóna svo mikið bleikt og fjólublátt og svoleiðis að mér þótti mál að linni. Fór í hauginn og safnaði saman öllu grænu sem ég fann. Og viti menn! Það var hellingur í boði. Bætti svo við tveimur litlum dokkum sem ég keypti til að fullkomna efnisvalið. Í garnbúðinni hékk ljómandi fínt poncho passlegt á þriggja ára - kerlingarherfan neitaði að gefa mér uppskriftina - en benti góðfúslega á að þær væru til sölu ef maður keypti efni á staðnum... og aðeins þá. Ég lét hneykslun mína í ljós og settist svo við borð þar sem uppskriftin var í möppu. Las hana og spurði svo hvort ég mætti ekki bara skrifa hana upp því hún var svo einföld. Þetta var auðvitað mikil móðgun og illt auga fékk ég. Þá hljóp í mig kapp og ég sagðist bara ætla að leggja hana á minnið- og gerði það. Muahahahah ég er prjónaanarkisti.

Bleika blómahúfan

2007-03-04T18:08:00.000Z

Rúna er mjög áhugasöm um prjónaskap og handavinnu eins og komið er fram. Hún bað mig mjög fallega að prjóna handa sér bleika húfu. Bleikir hlutir eru efstir í virðingarstiganum í heimi krónprinsessunnar. Þessi er gerð úr tyrkneska blómapallíettugarninu, með dökkbleikum mohair kanti - sló í gegn.

Nýtni

2007-03-04T17:29:00.000Z

Það er hægt að lengja líftíma fata með því að prjóna stroff og sauma á. Þetta er einfalt og sjúklega smart eins og sést á þessum myndum. Á gallabuxunum er stroff úr tyrknesku diskógarni og á mussunni er stroff úr loðbandi og mohair. Það síðarnefnda er búið að þvo á 40 og hefur aðeins þæfst við það - en það kemur alls ekki að sök. Hugmyndin kom úr dönsku blaði... nema hvað!

Húfa handa Álfrúnu

2007-03-04T13:46:00.000Z

Þessi er hekluð úr léttlopa. Einföld og fín og búin til fyrir litlu álfastelpuna Álfrúnu á Íslandi - hún er minnsta stjúp-stjúpsystir mín, eins árs og sjúklega sæt. Ég ætla að biðja um mynd af henni með húfuna.

Svoldið galinn

2007-03-04T13:05:00.000Z

Þetta er heklaður trefill sem er hægt að gera eins stóran og langan og mann lystir og litirnir stjórna "the level of madness". Í þessum er íslenskt loðband og mohair mismunandi þykkt. Uppskriftin er mín en innblásin af einhverju sem ég sá í dönsku blaði.

Eldgamlir heklupokar

2007-03-04T12:38:00.000Z

Ég hef örugglega heklað sjöhundruð svona poka. Bara marglitt bómullargarn og fastahekl. Eins einfalt og hægt er. Garnbúð í Stokkhólmi er að bjóða tveggja tíma námskeið í að hekla nákvæmlega svona poka - kostar tæpan 300 kall (SEK) ÁN efnis!! En þeir eru sætir og standa fyrir sínu... til dæmis í staðinn fyrir pappír utan um litlar gjafir.

Megrunarprjón

2007-03-04T12:19:00.000Z

Nú hafa prjónaverkin hlaðist upp hjá mér og kominn tími til að dæla dágóðum skammti inn á síðuna. Ég komst að einni skemmtilegri og hjartanlega velkominni hliðarverkun prjónaskaps... Ansi lógísk hliðarverkun samt, sérstaklega ef prjónarinn er ákafur og heldur sér vel að verki. Þetta veldur því að hendur prjónarans og athygli eru föst við verkið og á meðan er ekki hægt að BORÐA MAT!! Þess vegna mjókkar sá sem prjónar hægt og sígandi... Skemmtilegt þetta ef af nógu er að taka.

Lítill lærlingur

2007-01-01T22:04:00.000Z

Litla sæta skottan er svo hrifin af öllu sem mamma prjónar og vill prófa allt. Hér erum við saman með hálsskautin grábláu á gamlárskvöldi. (og nei, ég er ekki drukkin, bara andaktug yfir áramótum)

Þrjú stykki úr sama efni

2007-01-01T21:54:00.000Z

Sumt garn er svo fallegt saman. Hér blandaði ég saman svörtum lopa, gráum lopa, grábláu þykku mohair og bláu glimmer brjálæðisgarni. Fyrsta verkið varð kragi eða hálsskraut. Svört ull hekluð í kassa (eins og múrveggur með tveimur lögum múrsteina) sem liggja saman og svo er garn þrætt í gegn og bundið í endana í kögur... ehm, vona að þessi lýsing sé skýr sem sól í heiði. Næsta varð svo aðeins þykkari kragi, líka heklaður, látið beygjast um hálsinn, svo er smá lykkja aftan á sem hægt er að smeygja aftari endanum í... voila... hlýtt og gott og lekkert. Síðasta er sjúklega einfalt, bara hellingur af garni, sirka 2ja metra þræðir lagðir saman og hnútar hnýttir, tvær marokkókúlur þræddar á endana. Þetta er nú hægt að gera á fimm mínútum ef veisludressið er ekki aaalveg nógu glamorös. Sko bara hvað ég var fín á gamlárs!

Frænkurnar

2007-01-01T21:42:00.000Z

Rúna er full lotningar þegar hún hittir frænkurnar þrjár í Uppsala enda eru þær sætar og skemmtilegar og klárar. Allar fengu þær prjónaðar jólagjafir. Maarit fékk trefil af sömu sort og mamman, þessi þó hvítur og með gullbandinu dýrmæta. Tinna fékk húfuna gráu með bleikum blómapallíetttubekk. Jónína fékk bleika trefilinn.

Jólagjöf Dúddu

2007-01-01T21:36:00.000Z

Dúdda frænka mín fékk heklaðan trefil úr tvöföldum svörtum plötulopa og dýrindis gullbandi. Heklað á göndul einn mikinn, heklunál númer 15. Hún er bara ljómandi fín móðursystir mín sæta.

Fyrir höfuðstóra

2006-12-21T10:04:00.001Z

Veit ekki hver ætti að fá þessa, hver er mjög höfuðstór sem ég þekki... hmmm? Hún er hekluð úr bláu mohair garni (toppur og kantur neðst) og einföldum plötulopa, mjóu gráu mohair plús glimmerþræði. Frekar sæt. Kannski prófa ég að þæfa hana í höndunum... ehm.

Þæfing er list

2006-12-20T10:58:00.002Z

Þessu komst ég að "the hard way". Var búin að hekla þessa fínu risastóru álfahúfu sem átti að passa á Rúnuhaus eftir þæfingu. Stakk henni í vél á 40 með einum gallabuxum og einu handklæði. Því er skemmst frá að segja að húfan varð pínulítil og passleg fyrir babyborn, sem reyndar bráðvantaði hlýja húfu. Samt fín.

Bleikur með blómapallíettum

2006-12-20T10:58:00.000Z

Frábært þetta garn sem ég fann á ebay og fékk svo sent frá Tyrklandi á methraða fyrir smápening. Hér er það orðið að sætum stelputrefli sem fer í stelpujólapakka. Mjög einfalt að hekla. Maður byrjar á að hekla langt band, heklar svo stöpla eða pinna eða hvað þetta nú heitir, tvo í hverja lykkju alla leiðina til baka. Svo eina umferð í viðbót af stöplum, þá ein í hverja lykkju. Gaman að hafa hann svoldið langan svo að hann krullist skemmtilega um hálsinn.

Sjalatíð

2006-12-20T10:49:00.000Z

Nú er mál að linni með húfur... eða þannig. Það er amk gott að hafa eitthvað annað á verkaskránni en bara húfur. Sjöl og treflar eru þess vegna í sterkri sókn um þessar mundir. Hér er ein fín vestfirsk hyrna prjónuð úr fínu Texas ullinni sem ég keypti á ebay. Fer líka í jólapakka!

Jólin koma

2006-12-20T10:41:00.000Z

... og mér er sveimérþá að takast að prjóna og hekla alveg helling sem fer í pakka. Þó ekki til allra, enda er fjölskylda mín ónáttúrlega stór á alla mögulega mælikvarða. Hér er ein hekluð lopahúfa með bleikum pallíettublómagarnsbekk. Fer í einhvern pakka.

Áfram KR

2006-12-20T10:06:00.000Z

Þeir sem þekkja mig vita að mig skortir gersamlega íþróttatilfinningar. Eiginlega er mér nákvæmlega sama hver vinnur hvað, nema kannski þegar Ragga frænka keppir í sundi. En Sindri minn heldur upp á KR og þá þótti mér sjálfsagt að bregðast snarlega við og prjóna á hann almennilega KR húfu. Þetta er einföld fastahekluð lopahúfa prjónuð frekar víð. Svo þótti mér þjóðráð að þæfa hana. 40 gráður í þvottavél á stuttu prógrammi og viti menn... húfan kom út doldið dvergsleg. En passar svona ljómandi vel á annan haus - nefnilega Ragnar Gauk sem að auki er Vesturbæjarstrákur og mun fyrr eða síðar verða KR-ingur.

Ein enn

2006-12-12T19:33:00.000Z

Hér er ein sem ég er nokkuð ánægð með. Bláa garnið er mohair og hvíta er alpaca ull. Kanturinn er tvöfaldur niðursaumaður fastaheklaður, húfan er hekluð í hálfpinnum. Mjúk og hlý og sæt. Reyndar frekar þröng en mun passa á einhvern lítinn sætan haus.

Muna að mynda

2006-12-10T21:47:00.000Z

Nú hef ég prjónað og heklað af svo miklu kappi að fjölskyldunni þykir nóg um. Svo set ég í pakka og sendi um heiminn þveran. Hanako fær fína húfu og sjal, klassíska vestfirska hyrnu úr lopa og glimmerþræði!! En almáttugur hjálpi mér því ég gleymdi að mynda þessa ljómandi fallegu hluti og er búin að pakka inn og setja pakkann í pakka og merkja og svo fer þetta af stað til Tokyo í fyrró. Ég verð að muna að biðja hana að klæða sig í gjöfina og mynda og senda yfir... En í millitíðinni set ég inn sæta mynd af elsku Héðni mínum með hinn fagra son sinn Tabító Þór.

Pílagrímsferðir

2006-12-10T21:06:00.000Z

Sumir fara til Mekka, í gamla daga fóru einhverjir til Rómar en ég fer í prjónabúðir í Stokkhólmi. Þær eru nokkrar en mishipp og miskúl. Ég reyni að sjálfsögðu að láta sjá mig í þeim svölu en hinar eru líka mikilvægar því þar er garnið gjarnan ódýrara. Hippu og kúlu búðirnar gegna samt öðruvísi hlutverki því þær veita svo mikinn innblástur. Endalausir litir, smart raðað í hillur, girnileg áferð, lyktin líka eitthvað góð og minnir á langömmuprjónaðan ullarsokk nýfrelsaðan úr jólapakka. Svo má nota innblásturinn úr fíneríisbúðunum til að prjóna fína hluti úr sparnaðargarni keyptu á ebay eða garnbónusbúðum eða úr íslenskri ull... já hún er nefnilega fáránlega ódýr. Lifi sauðkindin.

Texas - Stockholm

2006-12-10T20:03:00.000Z

Ebay er dásamlegt fyrirbæri fyrir prjónara og garnsjúklinga. Hægt að kaupa garn úr öllum kimum heimsins á smábrot af verðinu skammarlega sem viðgengst hér á vesturhveli. Ég prófaði um daginn að panta forláta ullargarn allaleið frá Texas og það kom í vikunni. Gasalega mjúkt og fínt litaskiptigarn. Búin að hekla eina húfu sem fer í afmælispakka til Ernu stjúpu. Fastahekl neðst, hálfpinnar og svo fastahekl aftur í toppnum. Held að þetta séu hennar litir bigtime.

Líður að jólum

2006-12-10T19:37:00.000Z

Í nóvember þegar ég var komin með alvarlega handavinnubakteríusýkingu þótti mér sjálfsagt mál að allir fengju prjónaðar eða heklaðar eða ísaumaðar jólagjafir í ár. Það rætist reyndar að hluta því allnokkrir fá mjúka pakka með hlýjum gjöfum. Myndin er af bolnum sem Sara litla frænka í Þýskalandi fær ásamt dulitlum prinsessubúnaði sem þykir nauðsynlegur fyrir þriggja ára dömur.

Álfurinn litli

2006-12-10T19:27:00.000Z

Mér áskotnaðist forláta heklunál númer 9 úr ekta plasti. Handavinnugyðjan Halldóra Skarphéðinsdóttir lét hana af hendi rakna af einskærri rausn. Þá fór tíminn á húfuhekli niður í 36 mínútur umþaðbil. Ég er búin að hekla og prjóna agalega fín húfutreflasett á mig og Rúnu Lóu úr mohair og lopa. Rúna er auðvitað eins og lítil álfaskessa í þessarri múnderingu. Mitt sett er úr blágrænu móheri og hvítum lopa og í því er ég um það bil eins og stóra skessan sem sagði þeirri litlu að sækja stóra nautið hans föður síns í ákveðinni sögu sem við þekkjum öll.

Útgáfa handan við hornið

2006-11-24T21:47:00.000Z

Bergur er búinn að hanna forsíðuna...

Sokkar á prjónum

2006-11-22T20:19:00.000Z

Keypti þetta Opalgarn á symässan... svona sjálfmunstrandi. Ekkert smá gaman að prjóna úr þessu því það er svo spennandi að sjá hvernig litirnir koma út. Ég er að prjóna sokka á sjálfa mig - aldrei þessu vant eitthvað fyrir mig. Ég gerð samt smá villu sem glámskyggnir prjónendur sjá kannski á myndinni. Eftir hælstykkið gerði ég úrtökuna ofan á ristinni í staðinn fyrir á ilinni - kórvilla en dæmigerð fyrir prjónandi uppreisnarsegg eins og mig. Því þarf ég nú að rekja upp og endurúrtaka eða endurtaka úr. En það er nú alltílagi fyrir svona stóíska og þolinmóða konu.

Bleiki hnykillinn

2006-11-22T20:09:00.000Z

Þennan risastóra bleika hnykil keypti ég á Symässan um daginn. Þetta er frekar fínt bómullargarn, eiginlega heklugarn. Svo fann ég nokkra afgangshnykla í passandi litum og ákvað að byrja á "einhverju". Prjónar nr 2.5 held ég og bara sléttprjón í hring. Svo hugsaði ég og hugsaði... og loks rann upp fyrir mér ljós. Þetta verður pils á Rúnu Lóu!! Æstir fylgismenn lesprjónsbloggsins fá að sjálfsögðu að fylgjast með framgangi mála.

Prjónakona

2006-11-22T20:01:00.000Z

Í dag var litla stelpan lasin heima með pabba sínum. Hann spurði hana hvað hún ætlar að verða þegar hún verður stór. Taldi svo upp ýmsar starfsgreinar (hjúkrunarkona, læknir ofl) sem henni eru hugleiknar um þessar mundir. Svo sat hún hugsi en sagði svo "ég ætla að verða prjónakona". Þetta bræddi nú alveg mömmuhjartað. Hún fær stundum að sitja í fanginu með hendurnar sínar á mínum þegar ég prjóna. Þannig að vonir standa til að tæknin osmósist inn í hana... amk hefur áhuginn gert það nú þegar.
Á myndinni er Rúna í lopapeysunni sem Slauga prjónaði fyrir Hlyn.

Lopapeysan að verða tilbúin

2006-11-22T19:55:00.000Z

Hér er lopapeysan sem ég byrjaði á í febrúar 2005. Svo lá hún og beið lengi... og í sköpunarkastinu nýja prjónaði ég loksins axlastykkið. Núna er bara hálsmálið eftir og svo rennilás. Rúna Lóa er ennþá í Hlyns peysu sem Slauga Slaug prjónaði fyrir 13 árum. Hún er að verða of lítil svo að þessi verður tilbúin akkúrat á réttum tíma. Rúna er annars mikil lopapeysustelpa.

Biðukolla 2

2006-11-22T19:50:00.000Z

Önnur biðukolla, sama uppskrift. Eyrún sæta fékk þessa í 6 ára afmælisgjöf. Hér eru kantur og blóm hekluð með íslenskum lopa, þrjár perlur í blóminu. Mohair garnið heitir Vienna og er til í ýmsum kreisí litum... hugsa að fleiri svona komi.

Biðukolla 1

2006-11-22T19:43:00.000Z

Þessi loðna húfa er hekluð úr Mohair á grófa heklunál. Númer I... sko amerísk, veit ekki hvað það þýðir í millimetrum. Áðan bað Ásta mig um uppskriftina og hún er einhvern veginn svona: byrja efst, hekla hring og auka í slatta þar til hringur er orðinn sæmilega stór, hætta þá að auka og hekla áfram. Klára dokkuna og hekla svo kant í öðrum lit og blóm. Glöggir sjá kannski að þetta er fremur ónákvæm uppskrift... svoldið einsog eldamennskan mín. Kannski ætti ég að hemja mig og temja og fara að skrifa samviskusamlega lykkjufjölda eins og Halldóra Skarphéðinsdóttir vinkona mín og fyrirmynd í góðum siðum.

Hnerr hnerr

2006-11-12T17:54:00.000Z

Mohair geit verður ekki mitt næsta gæludýr. Ég er búin að sitja í kvöld og hekla sæta græna húfu á Rúnu og hef hnerrað hundraðogsjötíusinnum við verkið. En það er vel þess virði því húfan verður mjög sæt og loðin, svo eiga að vera á henni nokkur blóm og í það minnsta ein kind. Mynd bráðum. Keypti líka boli í dag til að bródera - fyrir hina árlegu HM endurgreiðslu... ég fékk 600 kall í innleggi enda búin að strauja meðlimskortið extra í hvert skipti sem gestir hafa farið offari í fatakaupum. Ég ætla að bródera Ísland í boli sem fara til Japan og Sörunafn í bolinn sem fer til Söru sætu í Dusseldorf. Var líka svo heppin að fá "sorríviðskiptumumnafn" innleggsnótu í Akademibokhandeln og festi kaup á prjónabók - trallalla. Hún heitir Stitch'n'bitch Nation og fjallar um mjög hipp og kúl grasrótarprjónaskap í Ameríku.

Hér er geitin

2006-11-11T21:05:00.000Z

Hér er þessi líka hressa mohair geit. Bara að bíða eftir næstu rúningu eða eitthvað.

Dúlluskór

2006-11-11T20:55:00.000Z

Hér eru sætir skór fyrir litla stelpu sem er alveg ný og býr í Osló. Hugmynd kom frá sjálfri Mörthu Stewart fyrirmynd kvenna í góðum siðum og gestrisni. Efnið er ullarfilt og blómið heklað úr mohair garni. Já vissuð þið að mohair garnið kemur af mohair geitinni... best að finna af henni mynd.

Bróderí

2006-11-11T20:48:00.000Z

Keypti frábæra bók sem heitir "Baby Cool". Geggjaðar hugmyndir að breytingum á barnafötum og ótrúlega sniðugar saumauppskriftir. Til dæmis er samfestingur saumaður úr gamalli köflóttri skyrtu, galli saumaður úr gömlum Sex Pistols stuttermabol... já og bara allskonar flott. Höfundurinn er búningahönnuður í Dramaten og ekkert smá klár. Hún heldur workshops... og ég ætla að skipuleggja svoleiðis fyrir íslenskar kynsystur mínar hér í Stokkhólmi - nema hvað!!

Dótturdóttir í lopapeysu

2006-11-11T20:29:00.000Z

Hér er fjölskyldumeðlimurinn Babyborn Rúnudóttir í hlýrri og notalegri lopapeysu sem amma hennar prjónaði algjörlega fríhendis. Munstrið er frumsamið eins og peysan öll. Svoldið skökk en ég er mjög montin af henni.

Barbie ávallt í tísku

2006-11-11T20:18:00.000Z

Ég fór á brjálæðislega sauma- og prjónasýningu um daginn. Ég skoðaði kannski einn tíunda af básunum en það var alveg nóg til að fylla mig slíkri sköpunargleði að ég átti erfitt með svefn fyrir snilldarhugmyndum. Ég keypti smáveigis af garni, td risastóran hnykil með bleiku bómullargarni. Það fyrsta sem spratt fram úr þessum hnykli var þessi forláta sumarkjóll á Barbie. Á myndinni sést Barbie ljómandi ánægð með nýja kjólinn sinn en að sjálfsögðu alltaf elegant og afslöppuð.

Lopi og diskó

2006-11-11T20:09:00.000Z

Hér eru heklaðir vetlingar úr plötulopa. Tók klukkutíma að prjóna hvorn. Mohairgarn heklað efst og hjartað saumað með lykkjuspori. Mjög kúl. Eins og ég segi... það er hipp og kúl að prjóna.

Handa litlum strák

2006-11-11T19:58:00.000Z

Hér er svo ein prjónuð í einu stykki en á hlið. Þá er byrjað yst á annarri erminni og svo prjónað þvert yfir - mjög sætt. Svo í lokin eru líningar prjónaðar kringum öll opin. Reyndar byrjaði ég á henni ólétt, en fékk svo nóg af prjónaskap og var tæplega hálfnuð þegar ég lagði hana frá mér. Ég kláraði hana svo hér um daginn án uppskriftar því hana fann ég ekki - en það gekk ljómandi vel. Bara spegill. Lítill strákur í Japan á að fá þessa.

Eitt stykki

2006-11-11T19:53:00.000Z

Það er svo gaman að búa til litla hluti... því maður klárar þá og fær þá kikkið. Hér er ein enn barnapeysan prjónuð þegar Rúna Lóa var í maganum. Hún er prjónuð í einu stykki, garðaprjón, og byrjað neðst á bakstykkinu... svo bara prjónað allaleið yfir. Þessi varð svoldið mjó og ermavíð enda prjónuð fríhendis sirkabát. Ullin er Dala-babyull sem má þvo á 40 (snilld). Tölurnar eru sætar appelsínusneiðar. Ég er ánægð með þessa.

Sjálfsstyrkingarelementið

2006-11-11T19:33:00.000Z

Sko... kannski er tengingin ekki alveg augljós. En staðreyndin er sú að á hverju einasta gógóplatsi (geðdeild á Marðar Ingólfsku) er prjón hluti meðferðarinnar og á stóran þátt í að fólk nær að lokum ásættanlegri geðhestaheilsu. Það er þetta með að áorka einhverju, sjá eitthvað verða til og ánægjan sem fylgir því að klára verkið og NOTA það eða gefa einhverjum sem manni þykir vænt um. Ég vildi óska þess að ég hefði tekið myndir af öllu því sem ég hef skapað gegnum tíðina. En í stað þess að væla yfir því að hafa EKKI gert það ætla ég að byrja núna og reyna mitt best í að skrásetja allt samviskulega í framtíðinni. Myndirnar set ég á þetta blogg - svo þarf ég bara að kíkja á lesprjónsbloggið til að fá akút sjálfsstyrkingarskammt. Gott plan. Hér er mynd af einni afgangapeysu sem ég prjónaði á meðan Rúna Lóa var í maganum og ég lá með hið stórskemmtilega grindarlos og notaði tímann til að prjóna, ráða krossgátur og "leggja" kapal í gemsanum (stuð).